கரும்பு சாகுபடியை பெருக்கி படாளம் கூட்டுறவு சர்க்கரை ஆலையை தொடர்ந்து இயக்க வேண்டும் - அன்புமணி ராமதாஸ் கோரிக்கை!

வரலாற்றுச் சிறப்புமிக்க ஆலை:

செங்கல்பட்டு மாவட்டம் படாளத்தில் கடந்த 1961-ஆம் ஆண்டு மதுராந்தகம் கூட்டுறவு சர்க்கரை ஆலை தொடங்கப்பட்டது. இது தமிழகத்தின் மிகப்பழமையான மற்றும் அதிக அரவைத் திறன் கொண்ட கூட்டுறவு சர்க்கரை ஆலைகளில் ஒன்றாகும். நாளொன்றுக்கு 2,500 டன் கரும்பு அரவை செய்யும் திறன் கொண்ட இந்த ஆலையில், ஆண்டுதோறும் அக்டோபர் மாதம் தொடங்கி பிப்ரவரி மாதம் வரை சர்க்கரை உற்பத்தி விறுவிறுப்பாக நடைபெறுவது வழக்கம்.

முடங்கும் பணிகள்: விவசாயிகள் சந்தேகம்:

வழக்கமாக, சர்க்கரை உற்பத்தி தொடங்குவதற்கான ஆயத்தப் பணிகள் ஜூலை மாதத்திலேயே தொடங்கிவிடும். இதன் முதற்கட்டமாக, ஆலையின் ஒப்பந்தத் தொழிலாளர்களைப் பணியில் இணைக்கும் நடைமுறை மேற்கொள்ளப்படும். ஆனால், நடப்பு ஆண்டில் ஜூலை, ஆகஸ்ட் மாதங்கள் முடிந்து செப்டம்பர் பிறந்துவிட்ட நிலையிலும், ஒப்பந்தத் தொழிலாளர்களைப் பணியில் அமர்த்தும் பணிகள் இன்னும் தொடங்கப்படவில்லை.

வரும் அக்டோபர் ஒன்றாம் தேதி முதல் தமிழகத்தில் சர்க்கரை ஆலைகளின் அரவை பருவம் தொடங்கவுள்ளது. இந்நிலையில், ஒப்பந்தப் பணியாளர் நியமனம் உள்ளிட்ட எந்தவொரு அடிப்படைப் பணிகளும் படாளம் ஆலையில் மேற்கொள்ளப்படாததால், இந்த ஆலையை நிரந்தரமாக மூடுவதற்கு அரசு திட்டமிட்டுள்ளதோ என்ற அச்சமும், ஐயமும் எழுந்துள்ளது.

ஆலை முடங்கிய பின்னணி:

படாளம் கூட்டுறவு சர்க்கரை ஆலையில் திண்டிவனம், வானூர், மேல்மருவத்தூர், படாளம், செங்கல்பட்டு, மதுராந்தகம், உத்திரமேரூர், திருக்கழுக்குன்றம் உள்ளிட்ட 10 கரும்பு கோட்டங்களைச் சேர்ந்த 29,632 விவசாயிகள் உறுப்பினர்களாக உள்ளனர். இப் பகுதிகளில் உள்ள 1,62,327 ஏக்கர் பரப்பளவில் பயிரிடப்படும் கரும்பு இந்த ஆலைக்கு வழங்கப்பட வேண்டும்.

ஆரம்பக் காலத்தில் ஆண்டுக்கு 90 ஆயிரம் டன் கரும்பு அரவையுடன் உற்பத்தியைத் தொடங்கிய இந்த ஆலை, ஒரு கட்டத்தில் ஆண்டுக்கு 6 லட்சம் டன் வரை கரும்புகளை அரவை செய்து சாதனை படைத்தது. ஆனால், காலப்போக்கில் ஆலையைத் தனியார் மயமாக்கும் நோக்குடன் கரும்பு அரவை படிப்படியாகக் குறைக்கப்பட்டு, கடந்த 2001-ஆம் ஆண்டில் படாளம் சர்க்கரை ஆலை முழுமையாக மூடப்பட்டது.

தமிழக அரசுக்குக் கோரிக்கை:

தமிழகத்தில் சர்க்கரைத் துறையின் வளர்ச்சிக்கு பெரும் பங்காற்றிய படாளம் சர்க்கரை ஆலையை மூடுவதற்கு அரசிடம் எந்தவொரு நியாயமான காரணமும் கிடையாது. எனவே, இந்த ஆலையை மூடும் திட்டம் ஏதேனும் இருந்தால், அதைத் தமிழக அரசு உடனடியாகக் கைவிட வேண்டும். கரும்பு சாகுபடியை இப்பகுதிகளில் மீண்டும் பெருக்கி, படாளம் கூட்டுறவு சர்க்கரை ஆலையைத் தொடர்ந்து லாபகரமாக இயக்குவதற்கான அனைத்து நடவடிக்கைகளையும் அரசு போர்க்கால அடிப்படையில் எடுக்க வேண்டும் என அன்புமணி ராமதாஸ் வலியுறுத்தியுள்ளார்.