மத்தியப் பிரதேசம்: ரூ.2,000-க்கு மேற்பட்ட UPI பரிவர்த்தனைகளை ஏற்க மறுக்கும் பெட்ரோல் பங்குகள்

போபால்:

மத்தியப் பிரதேசத்தில் உள்ள பெட்ரோல் பங்குகளில் ரூ.2,000-க்கு மேற்பட்ட பரிவர்த்தனைகளுக்கு UPI மூலம் பணம் பெறுவதை நிறுத்த பெட்ரோல் பங்க் டீலர்கள் முடிவு செய்துள்ளனர்.

மத்தியப் பிரதேச பெட்ரோல் பங்க் டீலர்கள் சங்கத்தின் தலைவர் அஜய் சிங், புதிய Merchant Discount Rate (MDR) கட்டண முறையை அரசு திரும்பப் பெறாவிட்டால், அக்டோபர் 16 முதல் ரூ.2,000-க்கு மேற்பட்ட UPI பரிவர்த்தனைகளை ஏற்க மாட்டோம் என தெரிவித்துள்ளார். இந்த முடிவு மாநிலத்தில் உள்ள சுமார் 4,700 பெட்ரோல் பங்குகளை பாதிக்கும் என தெரிவிக்கப்பட்டுள்ளது. 

UPI-க்கு MDR கட்டணம்

புதிய விதிமுறைகளின்படி, ரூ.2,000-க்கு மேற்பட்ட தகுதியான UPI வணிகப் பரிவர்த்தனைகளுக்கு 0.4% MDR கட்டணம் விதிக்கப்படும். பெட்ரோல் மற்றும் டீசல் போன்ற எரிபொருள் பரிவர்த்தனைகளுக்கு ரூ.2,000-க்கு மேல் செலுத்தப்படும் ஒவ்வொரு பரிவர்த்தனைக்கும் ரூ.5 என்ற நிலையான MDR விதிக்கப்படும் என தெரிவிக்கப்பட்டுள்ளது. இதனுடன் 18% GST சேரும்போது, ஒரு பரிவர்த்தனைக்கு சுமார் ரூ.5.90 செலவாகும் என பெட்ரோல் பங்க் உரிமையாளர்கள் தரப்பில் கணக்கிடப்பட்டுள்ளது.

பெட்ரோல் பங்க் உரிமையாளர்கள் கூறுவது என்ன?

பெட்ரோல் பங்குகள் ஏற்கனவே குறைந்த லாப வரம்பில் செயல்பட்டு வருவதாகவும், UPI பரிவர்த்தனைகளுக்கான கூடுதல் கட்டணத்தை தங்களால் ஏற்க முடியாது என்றும் சங்கம் தெரிவித்துள்ளது.

ஒரு பெட்ரோல் பங்கில் தினசரி சராசரியாக ரூ.2,000-க்கு மேற்பட்ட சுமார் 100 UPI பரிவர்த்தனைகள் நடைபெறுவதாக சங்கம் கூறியுள்ளது. இதனால் ஒவ்வொரு பங்குக்கும் மாதத்திற்கு சுமார் ரூ.17,400 முதல் ரூ.17,700 வரை கூடுதல் செலவு ஏற்படும் என சங்கத் தலைவர் தெரிவித்துள்ளார்.

4,700 பெட்ரோல் பங்குகள் பாதிக்கப்படுமா?

மத்தியப் பிரதேசத்தில் உள்ள சுமார் 4,700 பெட்ரோல் பங்குகளிலும் இந்த முடிவு அமல்படுத்தப்படலாம் என சங்கம் தெரிவித்துள்ளது. இதனால் அதிக தொகைக்கு பெட்ரோல் அல்லது டீசல் வாங்கும் வாடிக்கையாளர்கள் UPI-க்கு பதிலாக பணம் அல்லது பிற ஏற்றுக்கொள்ளப்படும் கட்டண முறைகளை பயன்படுத்த வேண்டிய நிலை ஏற்படலாம். குறிப்பாக வணிக வாகனங்கள் மற்றும் அதிக அளவில் எரிபொருள் நிரப்பும் வாகன உரிமையாளர்களுக்கு இந்த மாற்றம் தாக்கத்தை ஏற்படுத்தக்கூடும் என செய்திகள் தெரிவிக்கின்றன.