நிதேஷ் திவாரி இயக்கத்தில் பிரம்மாண்டமாக உருவாகும் 'ராமாயணா' திரைப்படத்தின் ஆடியோ உரிமம் இந்திய அளவில் சாதனை விலைக்கு விற்கப்பட்டுள்ளதால், இசையமைப்பாளர் ஏ.ஆர்.ரகுமான் இந்திய திரையுலகில் மீண்டும் முதலிடத்தைப் பிடித்துள்ளார்.
இயக்குனர் நிதேஷ் திவாரி இயக்கத்தில், பிரம்மாண்ட பொருட்செலவில் உருவாகி வரும் 'ராமாயணா' திரைப்படம் இந்திய சினிமாவின் மிகவும் எதிர்பார்க்கப்படும் படங்களில் ஒன்றாக மாறியுள்ளது. இத்திரைப்படத்தில் ரன்பீர் கபூர் ராமராகவும், சாய் பல்லவி சீதையாகவும், கன்னட நடிகர் யாஷ் ராவணனாகவும் நடித்து வருகின்றனர். இரண்டு பாகங்களாக உருவாகும் இந்த காவியத் திரைப்படத்தின் முதல் பாகம் 2026 தீபாவளிக்கும், இரண்டாம் பாகம் 2027 தீபாவளிக்கும் வெளியாகும் என ஏற்கனவே அறிவிக்கப்பட்டுள்ளது.
ஏ.ஆர். ரகுமான் - ஹான்ஸ் ஜிம்மர் கூட்டணி:
இப்படத்திற்கு இந்தியாவின் ஆஸ்கர் விருது பெற்ற இசையமைப்பாளர் ஏ.ஆர். ரகுமான் மற்றும் உலகப் புகழ்பெற்ற ஹாலிவுட் இசையமைப்பாளர் ஹான்ஸ் ஜிம்மர் ஆகியோர் இணைந்து இசையமைத்து வருகின்றனர். இவர்களின் கூட்டணியால் படத்தின் மீதான எதிர்பார்ப்பு ரசிகர்கள் மத்தியில் உச்சத்தை தொட்டுள்ளது.
மிரட்டலான ஆடியோ பிசினஸ் சாதனை:
தற்போது வெளியாகியுள்ள நம்பகமான தகவலின்படி, 'ராமாயணா' படத்தின் இரண்டு பாகங்களின் ஆடியோ உரிமமும் முன்னெப்போதும் இல்லாத வகையில் ரூ. 85 கோடிக்கு (டி-சீரிஸ் நிறுவனத்திற்கு) விற்பனையாகி சாதனை படைத்துள்ளது. இதற்கு முன்னதாக அட்லீ இயக்கத்தில் ஷாருக்கான் நடித்த 'ஜவான்' திரைப்படத்தின் ஆடியோ உரிமம் ரூ. 30 கோடிக்கு விற்கப்பட்டதே உச்சகட்ட சாதனையாக இருந்தது. தற்போது அந்த சாதனையை 'ராமாயணா' படம் தவிடுபொடியாக்கியுள்ளது.
சினிமா வியாபாரத்தைப் பொறுத்தவரை எந்த இசையமைப்பாளரின் படத்தின் ஆடியோ உரிமம் அதிக விலைக்கு விற்கப்படுகிறதோ, அவரே நம்பர் 1 இசையமைப்பாளராகக் கருதப்படுவார். அந்த வகையில் இந்த அசாத்தியமான டீல் மூலம் ஏ.ஆர். ரகுமான் இந்திய அளவில் மீண்டும் நம்பர் ஒன் இசையமைப்பாளர் என்ற அரியாசனத்தை அலங்கரிப்பதாக சினிமா வட்டாரங்கள் தெரிவிக்கின்றன.
0 Comments
No comments yet. Be the first to comment.