2.50 லட்சம் மரங்களை அழித்த கூகுள்! AI டேட்டா சென்டர் பணிகளுக்கு அதிரடித் தடை!
பின்லாந்தில் கூகுள் நிறுவனத்தின் புதிய AI டேட்டா சென்டருக்காக சுமார் 2.50 லட்சம் மரங்கள் வெட்டப்பட்டதால் கடும் சுற்றுச்சூழல் சர்ச்சை வெடித்துள்ளது. முறையான ஆய்வுகள் இன்றி மரங்கள் அழிக்கப்பட்டதால், கட்டுமானப் பணிகளை நிறுத்த அந்நாட்டு அதிகாரிகள் உத்தரவிட்டுள்ளனர்.
செயற்கை நுண்ணறிவு (AI) தொழில்நுட்ப வளர்ச்சிக்காக கூகுள் நிறுவனம் பின்லாந்தில் மேற்கொண்டுள்ள புதிய டேட்டா சென்டர் திட்டம் பெரும் சுற்றுச்சூழல் சர்ச்சையை ஏற்படுத்தியுள்ளது. இந்த மையத்தை அமைப்பதற்காக அங்கு சுமார் 2.50 லட்சம் மரங்கள் வெட்டப்பட்டுள்ளதாக அதிர்ச்சியூட்டும் தகவல்கள் வெளியாகியுள்ளன. இயற்கைக்கு எதிரான இந்த நடவடிக்கைக்கு அந்நாட்டில் தற்போது கடும் எதிர்ப்பு கிளம்பியுள்ளது.முஹோஸ் மற்றும் ஒட்டன்மாக்கி ஆகிய பகுதிகளில் பெரிய அளவிலான வனப்பகுதிகள் அழிக்கப்பட்டு, மேல் மண் அகற்றப்பட்டு கட்டுமானச் சாலைகள் அமைக்கப்பட்டுள்ளன. இதனால் மழைநீரில் மண் கலந்து அருகில் உள்ள நீர்நிலைகள் மாசடைவதுடன், வனவிலங்குகளின் வாழ்விடங்களும் கடுமையாகப் பாதிக்கப்படும் என இயற்கை ஆர்வலர்கள் மிகுந்த கவலை தெரிவித்துள்ளனர்.
முறையான சுற்றுச்சூழல் தாக்க ஆய்வுகளை (EIA) முழுமையாக முடிப்பதற்கு முன்பே கூகுள் நிறுவனம் நிலத்தை சீரமைத்ததாகக் குற்றச்சாட்டுகள் எழுந்தன. இதன் அடிப்படையில் விசாரணை நடத்திய அதிகாரிகள், உடனடியாக கட்டுமானப் பணிகளை நிறுத்த உத்தரவிட்டுள்ளனர். இதனையடுத்து தங்களது நடவடிக்கைக்கு மன்னிப்புக் கோரியுள்ள கூகுள் நிறுவனம், 130 ஹெக்டேர் பரப்பளவில் மீண்டும் புதிய மரக்கன்றுகளை நடுவதற்கு உறுதியளித்துள்ளது.பின்லாந்தில் டிஜிட்டல் தொழில்நுட்பத்தை விரிவுபடுத்த பல பில்லியன் யூரோக்களை கூகுள் முதலீடு செய்திருந்தாலும், தொழில்நுட்ப வளர்ச்சிக்காக இயற்கை வளங்களை எந்த அளவுக்கு அழிக்கலாம் என்ற மிக முக்கியமான கேள்வி தற்போது எழுந்துள்ளது. பல ஆண்டுகளாக வளர்ந்த பெரிய மரங்களுக்குப் பதிலாக புதிய கன்றுகளை நடுவது உடனடியாக சுற்றுச்சூழலை மீட்டெடுக்காது என்பதே நிதர்சனம். AI வளர்ச்சி அதிவேகமாக இருந்தாலும், அது இயற்கையைப் பாதிக்காமல் இருக்க வேண்டும் என்பதை இந்தச் சம்பவம் உலக நாடுகளுக்கு உணர்த்துகிறது.
0 Comments
No comments yet. Be the first to comment.