யாருமே உதவல.. நாங்களே ஜெனரேட்டர் வச்சோம்! - திருமழிசையில் நெஞ்சை உலுக்கும் அவலம்: அமைச்சரின் பதிவை சுக்குநூறாக்கிய மகனின் வீடியோ!

திருவள்ளூர் மாவட்டம் திருமழிசை ஆதவன் நகரைச் சேர்ந்த 75 வயதான முதியவர் அப்பன் ராஜ் என்பவர் வயது முதிர்வு காரணமாக உயிரிழந்தார். அவரது உடலை நேற்று மாலை சுமார் 6 மணியளவில் திருமழிசை - திருவள்ளூர் சாலையில் அமைந்துள்ள அரசு மின் மயானத்திற்குத் தகனம் செய்வதற்காக உறவினர்கள் கொண்டு சென்றனர். ஆனால், அங்கு மின்சாரம் இல்லாத காரணத்தால் உடலை உடனடியாகத் தகனம் செய்ய முடியாத அவல நிலை ஏற்பட்டது. இதனால் மழையிலும் இருளிலும் உறவினர்கள் முதியவரின் உடலுடன் சுமார் 3 மணி நேரத்திற்கும் மேலாகக் காத்திருக்கும் துயரமான சூழல் உருவானது. மின்தடை குறித்து சம்பந்தப்பட்ட அரசு அதிகாரிகளுக்கும், மின்வாரிய ஊழியர்களுக்கும் தகவல் தெரிவித்தும் எந்தவித உடனடித் தீர்வும் கிடைக்கவில்லை என உறவினர்கள் தரப்பில் குற்றம்சாட்டப்பட்டுள்ளது. நீண்ட நேரமாகக் காத்திருந்தும் அதிகாரிகள் தரப்பிலிருந்து யாரும் உதவிக்கு வராததால், வேறு வழியின்றி குடும்பத்தினரே தங்கள் சொந்தப் பணத்தைச் செலவழித்து ஒரு ஜெனரேட்டரை வாடகைக்குக் கொண்டு வந்தனர். அதன் பின்னரே, நள்ளிரவு நேரத்தில் மிகவும் தாமதமாக முதியவரின் உடல் தகனம் செய்யப்பட்டது

இந்தச் சம்பவம் தொடர்பாக அமைச்சர் நிர்மல் குமார் தனது 'எக்ஸ்' (X) சமூக வலைதளப் பக்கத்தில் ஒரு பதிவை வெளியிட்டிருந்தார். ஆனால், அமைச்சரின் அந்தப் பதிவில் கூறப்பட்டுள்ள தகவல்கள் முற்றிலும் உண்மைக்கு மாறானவை என்று கூறி, உயிரிழந்த அப்பன் ராஜின் மகன் ஒரு வீடியோவை வெளியிட்டுள்ளார். அந்த வீடியோவில், தங்களுக்கு அரசு அதிகாரிகளோ அல்லது மின்வாரிய ஊழியர்களோ நேரில் வந்து எந்த உதவியும் வழங்கவில்லை என்றும், தாங்களாகவே ஜெனரேட்டர் ஏற்பாடு செய்த பிறகே உடலைத் தகனம் செய்ய முடிந்தது என்றும் அவர் திட்டவட்டமாகக் கூறியுள்ளார்.

அமைச்சரின் கருத்துக்கும், பாதிக்கப்பட்ட குடும்பத்தினரின் விளக்கத்திற்கும் இடையே வெளிப்படையான முரண்பாடு நிலவுவதால் இந்தச் சம்பவம் முக்கியத்துவம் பெறுகிறது. மேலும், அரசு நடத்தும் மின் மயானங்களில் திடீர் மின்தடை ஏற்பட்டால் அதைச் சமாளிக்க ஜெனரேட்டர் போன்ற மாற்று மின் வசதிகள் கட்டாயம் இருக்க வேண்டும் என்ற கோரிக்கை எழுந்துள்ளது. உயிரிழப்பால் வாடும் குடும்பத்தினர் இதுபோன்ற நேரங்களில் மேலும் மன உளைச்சலுக்கு ஆளாவதைத் தடுக்க, மின் விநியோகத்தையும் மாற்று ஏற்பாடுகளையும் அரசு உறுதி செய்ய வேண்டும் எனப் பொதுமக்கள் வலியுறுத்துகின்றனர்.