திமுக ஆட்சியில் 2-வது இடத்திலிருந்து 10-வது இடத்திற்கு தள்ளப்பட்ட நெல் உற்பத்தி; தமிழக அரசின் அலட்சியமே காரணம் - பாஜக மாநிலத் தலைவர் அண்ணாமலை காட்டம்!
தமிழகத்தில் நெல் உற்பத்தி மற்றும் பொருளாதார வளர்ச்சி சரிந்துவிட்டதாகக் குற்றம் சாட்டியுள்ள பாஜக மாநிலத் தலைவர் அண்ணாமலை, விவசாயிகளுக்கான உள்கட்டமைப்புகளை உருவாக்க திமுக அரசு தவறிவிட்டதாகத் திருவாரூர் பிரச்சாரத்தில் பேசினார்.
தமிழகத்தில் தேர்தல் பிரச்சாரம் சூடுபிடித்துள்ள நிலையில், பாஜக மாநிலத் தலைவர் அண்ணாமலை டெல்டா மாவட்டங்களில் தீவிரப் சுற்றுப்பயணம் மேற்கொண்டு வருகிறார். திருவாரூரில் நடைபெற்ற பொதுக்கூட்டத்தில் உரையாற்றிய அவர், தமிழகத்தின் முதுகெலும்பாக விளங்கும் விவசாயத் துறை திமுக ஆட்சியில் மிகப்பெரிய வீழ்ச்சியைச் சந்தித்துள்ளதாகப் புள்ளிவிவரங்களுடன் பேசினார்.
இந்திய அளவில் நெல் உற்பத்தியில் முன்னதாக 2-வது இடத்தில் இருந்த தமிழ்நாடு, தற்போது 10-வது இடத்திற்குத் தள்ளப்பட்டுள்ளது. இந்த வீழ்ச்சிக்குத் திமுக அரசின் தவறான நிர்வாகமும், விவசாயக் கொள்கைகளுமே காரணம் என்று அண்ணாமலை குற்றம் சாட்டினார். "விவசாயிகளின் உழைப்பிற்குத் தகுந்த அங்கீகாரம் கிடைக்கவில்லை" என்றும் அவர் சுட்டிக்காட்டினார்.
விவசாயிகள் அறுவடை செய்த நெல்லினை பாதுகாப்பாக உலர்த்துவதற்குக் கூட போதிய உள்கட்டமைப்பு வசதிகளைத் தமிழக அரசு இன்னும் உருவாக்கவில்லை. மழைக் காலங்களில் நெல் மூட்டைகள் நனைந்து வீணாவதைக் கண்டும் காணாமல் அரசு இருப்பதாக அவர் சாடினார். நவீன உலர்கலன்கள் மற்றும் சேமிப்புக் கிடங்குகளை அமைக்கத் தவறியது திமுக அரசின் மிகப்பெரிய தோல்வி என அவர் பேசினார்.
தமிழகத்தின் பொருளாதார வளர்ச்சியில் திருவாரூர் மாவட்டம் 37-வது இடத்தில் பின் தங்கியிருப்பதாக அண்ணாமலை தெரிவித்தார். விவசாயத்தை மட்டுமே நம்பியுள்ள ஒரு மாவட்டம், முறையான அரசு ஆதரவு இல்லாததால் பொருளாதார ரீதியாக நலிவடைந்து வருவதாகவும், இது ஒட்டுமொத்த டெல்டா விவசாயிகளுக்கு இழைக்கப்படும் துரோகம் என்றும் அவர் குறிப்பிட்டார்.
தமிழக விவசாயிகளின் நலனைப் பாதுகாக்க மத்திய அரசு பல்வேறு திட்டங்களைக் கொண்டு வந்தாலும், அதனைச் சரியாகச் செயல்படுத்தாமல் மாநில அரசு அரசியல் செய்து வருவதாக அவர் தனது உரையில் கூறினார். அண்ணாமலையின் இந்தப் பேச்சு டெல்டா பகுதி விவசாயிகளிடையே பெரும் விவாதத்தை ஏற்படுத்தியுள்ளது.
0 Comments
No comments yet. Be the first to comment.