படத்தில் ஹீரோ.. நிஜத்தில்? பாலத்துக்கு அடியில் தவெகவினரைத் தான் கட்டிவைக்க வேண்டும்!" - கனிமொழி விளாசல்

பெண்கள் மற்றும் குழந்தைகளுக்கு பாதுகாப்பில்லை என்பதை வலியுறுத்தி, தவெக அரசைக் கண்டித்து சென்னை மாவட்ட ஆட்சியர் அலுவலகம் அருகே திமுக மகளிர் அணி சார்பில் மாபெரும் கண்டன ஆர்ப்பாட்டம் நடைபெற்றது. இதில் கலந்துகொண்டு சிறப்புரையாற்றிய திமுக நாடாளுமன்ற உறுப்பினர் கனிமொழி, "தெரியாமல் ஓட்டு போட்டுவிட்டோம், தப்பாகிவிட்டது" எனத் தமிழ்நாட்டுப் பெண்கள் தற்போது மிகுந்த வருத்தத்தில் உள்ளதாகக் குறிப்பிட்டார்.

மேலும், தற்போதைய அவல நிலையைக் கண்டு பெண்கள் அனைவரும் ஒன்று கூடி வீதிகளில் இறங்கிப் போராடத் தொடங்கிவிட்டதால், மாநிலத்தில் நிச்சயம் வெகு விரைவில் ஒரு பெரிய மாற்றம் வரும் என்று அவர் ஆணித்தரமாகத் தெரிவித்தார்.

திரையில் பெண்களுக்கு பாதுகாப்பு வழங்குவது போல் பேசிவிட்டு, நிஜத்தில் மக்களை ஏமாற்றி ஆட்சிக்கு வந்துள்ளார்கள் என அவர் குற்றம் சாட்டினார். திரைப்படங்களில் பெண்களுக்கு எதிராகக் குற்றம் செய்பவர்களைப் பாலத்துக்கு அடியில் கட்டித் தொங்கவிடுவேன் என வசனம் பேசியவர்கள், இன்று அதனை நிஜத்தில் செயல்படுத்த நினைத்தால், முதலில் பாலியல் குற்றங்களில் ஈடுபட்டுள்ள தங்களின் சொந்தக் கட்சிக்காரர்களைத்தான் (தவெக) கட்டிவைக்க வேண்டும் என்று கடுமையாகச் சாடினார். அந்த அளவுக்கு அக்கட்சியில் பெண்களுக்கு எதிரான வன்முறைகள் மலிந்துவிட்டதாக அவர் விமர்சித்தார்.

தவெக கட்சி நிர்வாகிகள் தொடர்ந்து செய்து வரும் பல்வேறு குற்றங்களை அவர் மேடையில் பட்டியலிட்டார். சென்னையில் இரண்டரை வயதுக் குழந்தை மீதான வன்கொடுமை மற்றும் ஆர்.கே. நகரில் 11 வயது சிறுமிக்கு நடந்த பாலியல் தொல்லை உள்ளிட்ட பல கொடூர சம்பவங்களில் அக்கட்சியின் நிர்வாகிகளே நேரடியாகக் கைது செய்யப்பட்டுள்ளனர். வேலை மற்றும் கட்சியில் பதவி வாங்கித் தருவதாக ஆசை வார்த்தைகூறி தூத்துக்குடி, சேலம், ராமநாதபுரம், ராணிப்பேட்டை போன்ற பல மாவட்டங்களில் அக்கட்சி நிர்வாகிகள் பெண்களை ஏமாற்றி வன்கொடுமை செய்துள்ளனர்.

சொந்தக் கட்சியின் பெண் நிர்வாகிகளுக்கே பாலியல் தொல்லை மற்றும் கொலை மிரட்டல் விடுக்கப்பட்டதாகவும், இந்தச் சம்பவங்களில் குற்றவாளிகளைக் காப்பாற்ற அக்கட்சியின் எம்.எல்.ஏ. ஒருவரே செயல்பட்டதாகவும் அவர் பகிரங்கமாகக் குற்றம் சாட்டினார். பெண்களுக்கு எதிரான குற்றங்கள் மட்டுமின்றி, சட்டம் ஒழுங்கு சீர்கேடு மற்றும் போதைப்பொருள் புழக்கம் குறித்தும் அவர் கடும் கவலை தெரிவித்தார்.

போதை மருந்து இல்லாத தமிழ்நாட்டை உருவாக்குவோம் என்று முழக்கமிட்டவர்களின் சொந்தக் கட்சியினரே 133 கிலோ மெத்தம்பெட்டமைன் மற்றும் கஞ்சாவுடன் பிடிபட்டுள்ளனர் என்றும், அக்கட்சி நிர்வாகிகள் குட்கா, கஞ்சா கடத்தலைத் தங்கள் முழுநேரத் தொழிலாகவே வைத்துள்ளதாகவும் அவர் சாடினார். தவெக ஆட்சிக்கு வந்த பிறகு 700 கொலைகளும், பெண்களுக்கு எதிரான 400 வன்முறைச் சம்பவங்களும் நடந்துள்ள நிலையில், காவல்துறை உண்மையான குற்றவாளிகளைத் தேடாமல், சமூக வலைதளங்களில் எதிர்க்கட்சியினர் என்ன பேசுகிறார்கள் என்பதை மட்டுமே கண்காணித்து கைது செய்வதாகக் கூறி தனது கடுமையான கண்டனத்தைப் பதிவு செய்தார்.