பெருந்துறையில் முதலமைச்சர் விஜய்யின் பிரம்மாண்ட ரோடு ஷோ: சாலையோரத் தடுப்புகளால் வாகன ஓட்டிகள் அவதி!
ஈரோடு மாவட்டம் பெருந்துறையில் இன்று (நவம்பர் 3) முதலமைச்சர் விஜய் பங்கேற்கும் ரோடு ஷோ மற்றும் நலத்திட்ட விழாவிற்காக சாலையோரங்களில் தடுப்புகள் அமைக்கப்பட்டுள்ளன. இதனால் அப்பகுதியில் வாகன ஓட்டிகள் கடும் சிரமத்தை சந்தித்து வருவதாக குற்றச்சாட்டு எழுந்துள்ளது
ஈரோடு மாவட்டம் பெருந்துறையில் இன்று (நவம்பர் 3) தமிழக முதலமைச்சர் விஜய் பிரம்மாண்ட ரோடு ஷோவில் பங்கேற்கிறார். இந்த நிகழ்வைக் காண பொதுமக்கள் மற்றும் ஆதரவாளர்கள் பெருமளவில் திரண்டுள்ளதால் அப்பகுதியில் பலத்த போலீஸ் பாதுகாப்பு போடப்பட்டுள்ளது. முதலமைச்சரின் வருகையை ஒட்டி நகர் முழுவதும் சிறப்பான வரவேற்பு ஏற்பாடுகள் செய்யப்பட்டுள்ளன. இந்த ரோடு ஷோ நிகழ்வுக்குப் பின்னர், பெருந்துறையில் உள்ள கொங்கு கல்லூரி வளாகத்தில் நடைபெறும் மாபெரும் விழாவில் முதலமைச்சர் கலந்து கொள்கிறார்.
இந்த விழாவில் 13 மாவட்டங்களைச் சேர்ந்த சுமார் 9,000 மகளிர் பயன்பெறும் வகையில், 1,110 கோடி ரூபாய் மதிப்பிலான பல்வேறு அரசு நலத்திட்ட உதவிகளை அவர் வழங்கவுள்ளார். இதற்கான விரிவான ஏற்பாடுகளை அரசு அதிகாரிகள் மேற்கொண்டுள்ளனர்.
முதலமைச்சரின் இந்த ரோடு ஷோ செங்கப்பள்ளி மேம்பாலத்தில் தொடங்கி பெருந்துறை புறவழிச்சாலை வழியாக செல்கிறது. சிப்காட் ரவுண்டானா, பழைய பேருந்து நிலைய ரவுண்டானா, புதிய பேருந்து நிலைய ரவுண்டானா, அரசு மருத்துவமனை ரவுண்டானா மற்றும் பணிக்கம்பாளையம் ஆகிய முக்கிய பகுதிகள் வழியாகச் சென்று மக்களை அவர் சந்திக்கிறார்.இருப்பினும், இந்த நிகழ்வுக்காக பெருந்துறை சாலையின் இருபுறங்களிலும் பாதுகாப்பு கருதி தடுப்புகள் அதிகளவில் அமைக்கப்பட்டுள்ளன.
இதன் காரணமாக அப்பகுதியில் போக்குவரத்து நெரிசல் ஏற்பட்டுள்ளதால், வாகன ஓட்டிகள் கடும் சிரமத்தை சந்தித்து வருவதாக குற்றச்சாட்டுகள் எழுந்துள்ளன. மக்கள் அன்றாட பணிகளுக்குச் செல்ல முடியாமல் தவித்து வருகின்றனர்.
0 Comments
No comments yet. Be the first to comment.