6 மணி காட்சிக்கு ஆதரவு இல்லை! – தனது நிலைப்பாட்டில் உறுதியாக இருக்கும் சீமான்!

சென்னை:

புதிய திரைப்படங்களுக்கு 'காலை 6 மணி முதல் சிறப்புக் காட்சிகள்' திரையிட தமிழ்நாடு அரசு அனுமதி வழங்கியுள்ள நிலையில், இந்த முடிவுக்கு நாம் தமிழர் கட்சியின் தலைமை ஒருங்கிணைப்பாளர் "சீமான் கடும் எதிர்ப்பு" "தெரிவித்துள்ளார். திரைப்படங்களுக்கும் பொழுதுபோக்குக்கும் அதிக முக்கியத்துவம் கொடுப்பதைவிட இளைஞர்களின் கல்வி, வேலைவாய்ப்பு மற்றும் சமூக முன்னேற்றத்திற்கு அரசு முன்னுரிமை அளிக்க வேண்டும் என அவர் வலியுறுத்தியுள்ளார்.

அதிகாலை காட்சிக்கு அனுமதி

தமிழ்நாடு அரசு, புதிய திரைப்படங்கள் வெளியாகும் முதல் ஏழு நாட்களுக்கு காலை 6 மணி முதல் மறுநாள் அதிகாலை 2.30 மணி வரை நாளொன்றுக்கு அதிகபட்சம் 6 காட்சிகள் திரையிட அனுமதி வழங்கியுள்ளது. மேலும், சனி, ஞாயிறு, உள்ளூர் பண்டிகை நாட்கள் மற்றும் பொது விடுமுறை நாட்களிலும் 6 காட்சிகள் திரையிட அனுமதி அளிக்கப்பட்டுள்ளது.

தமிழ்த் திரைப்படத் தயாரிப்பாளர்கள் சங்கம், திரையரங்கு உரிமையாளர்கள் சங்கம் உள்ளிட்ட திரைத்துறை அமைப்புகளின் கோரிக்கையைப் பரிசீலித்து இந்த அனுமதி வழங்கப்பட்டுள்ளது.

அரசு அனுமதி அளித்தது வெட்கக்கேடானது – சீமான்

இந்த முடிவுக்கு எதிர்ப்பு தெரிவித்து சீமான் வெளியிட்டுள்ள அறிக்கையில், புதிய திரைப்படங்கள் வெளியாகும்போது அதிகாலை 6 மணி முதல் நாளொன்றுக்கு ஆறு காட்சிகள் வரை திரையிட அனுமதி அளித்திருப்பது அதிர்ச்சியளிப்பதாகக் குறிப்பிட்டுள்ளார்.

ஒரு நாட்டின் மக்களை அறிவிலும் ஆற்றலிலும் சிறந்தவர்களாக உருவாக்க வேண்டிய அரசு, அதிகாலையிலேயே மக்களைத் திரையரங்குகளுக்கு அழைப்பதை முதன்மையான சாதனையாகக் கருதுவது வெட்கக்கேடானது என்றும் விமர்சித்துள்ளார்.

மேலும், போதைக்கும் பொழுதுபோக்குக்கும் முன்னுரிமை கொடுத்து எந்தச் சமூகமும் வாழ்ந்து வளர்ந்திருக்கிறது என்ற கேள்வியையும் அவர் எழுப்பியுள்ளார்.

இளைஞர்களின் எதிர்காலம் குறித்து கேள்வி

திரைப்படம் என்பது மனித வாழ்வின் ஒரு பகுதிதான்; அதுவே மனிதனின் ஒட்டுமொத்த வாழ்க்கையாகிவிடக் கூடாது என்று சீமான் தெரிவித்துள்ளார்.

ஒரு சமூகத்தின் வரலாறு, இலக்கியம், பண்பாடு, அறிவியல், அரசியல் மற்றும் பொருளாதாரம் என அனைத்தையும் திரையுலகத்தைச் சுற்றியே கட்டமைக்க நினைப்பது ஆபத்தான போக்கு என்றும் சுட்டிக்காட்டியுள்ளார்.

இளைய தலைமுறையினர் அதிகாலையில் எழுந்து படிக்கவும், உடலையும் உள்ளத்தையும் உறுதிப்படுத்தவும், உழைத்து உயரவும் அரசு வழிகாட்ட வேண்டும். ஆனால், அதிகாலையில் எழுந்து திரைப்படம் பார்க்கச் செல்லுங்கள் என்று ஊக்குவிப்பது அறிவார்ந்த சமூகத்தை உருவாக்கும் வழிமுறையா என்றும் கேள்வி எழுப்பியுள்ளார்.

பள்ளிகள், நூலகங்களுக்கு முன்னுரிமை அளிக்க வேண்டும்

திரைப்படக் காட்சிகளின் எண்ணிக்கையை அதிகரிப்பதில் காட்டும் அக்கறையை, பள்ளிகளின் கல்வித்தரத்தை உயர்த்துவதிலும், நூலகங்களை மேம்படுத்துவதிலும் அரசு செலுத்த வேண்டும் என சீமான் வலியுறுத்தியுள்ளார்.

அதேபோல், விளையாட்டுத் திடல்களை உருவாக்குதல், புதிய தொழில்களைத் தொடங்குதல், இளைஞர்களுக்கு வேலைவாய்ப்புகளை வழங்குதல் போன்ற மக்கள் நலத் திட்டங்களுக்கு முக்கியத்துவம் அளிக்க வேண்டும் என்றும் தெரிவித்துள்ளார்.

ஒரு நாட்டின் வளர்ச்சியைத் திரைப்படங்களின் வசூலைக் கொண்டு மட்டும் அளவிட முடியாது. மக்களின் கல்வி, அறிவு, உடல்நலம், வேலைவாய்ப்பு மற்றும் பொருளாதாரத் தன்னிறைவு ஆகியவற்றைக் கொண்டே மதிப்பிட வேண்டும் என்றும் தனது அறிக்கையில் குறிப்பிட்டுள்ளார்.

அரசின் முடிவை மறுபரிசீலனை செய்ய கோரிக்கை

புதிய திரைப்படங்களுக்கு அதிகாலை 6 மணி முதல் ஆறு காட்சிகள் வரை திரையிட அனுமதி அளித்துள்ள முடிவைத் தமிழ்நாடு அரசு மறுபரிசீலனை செய்ய வேண்டும் என சீமான் கோரிக்கை விடுத்துள்ளார்.

திரைத்துறையின் வளர்ச்சியுடன் சமூகத்தின் முன்னேற்றத்தையும் அரசு கருத்தில் கொள்ள வேண்டும் என்பதே அவரது வலியுறுத்தலாக உள்ளது. இந்த விவகாரம் திரைத்துறையினர் மற்றும் அரசியல் வட்டாரங்களில் விவாதத்தை ஏற்படுத்தியுள்ளது.