பிரமாண்டமாக நடைபெறும் தனுஷின் ‘ஓம்’ திரைப்படத்தின் இசை வெளியீட்டு விழா!

சென்னை:

நடிகர் "தனுஷ்" நடிப்பில் உருவாகியுள்ள ‘ஓம்’ திரைப்படத்தின் இசை வெளியீட்டு விழா இன்று (நவம்பர் 6) சென்னையில் பிரமாண்டமாக நடைபெற்று வருகிறது. தாம்பரம் அருகே உள்ள சாய் ராம் பொறியியல் கல்லூரியில் நடைபெறும் இந்த விழாவில் தனுஷ் ரசிகர்கள் மற்றும் அவரது நற்பணி இயக்க நிர்வாகிகள் எனப் பலர் கலந்துகொண்டுள்ளனர். நீண்ட நாட்களுக்குப் பிறகு தனுஷின் திரைப்பட விழா பிரமாண்டமாக நடைபெறுவதால் ரசிகர்கள் மத்தியில் பெரும் எதிர்பார்ப்பு நிலவுகிறது.

தனுஷ் நடிக்கும் ‘ஓம்’ திரைப்படம்

‘அமரன்’ திரைப்படத்தின் இயக்குநர் ராஜ்குமார் பெரியசாமி இயக்கத்தில் தனுஷ் நடித்து வரும் புதிய திரைப்படம் ‘ஓம் – சாப்டர் 1: உதிரம் – தி பிளட் வுட்’. தனுஷின் 55-வது திரைப்படமாக உருவாகும் இப்படத்தில் மலையாள நடிகர் மம்முட்டி, சாய் பல்லவி, ஸ்ரீலீலா, நசீருதீன் ஷா மற்றும் இந்திரன்ஸ் உள்ளிட்ட பல முன்னணி நடிகர்கள் முக்கிய கதாபாத்திரங்களில் நடித்துள்ளனர்.

குறிப்பாக, தனுஷ் மற்றும் மம்முட்டி முதன்முறையாக இணைந்து நடிப்பதால் இப்படத்தின் மீதான எதிர்பார்ப்பு அதிகரித்துள்ளது. ஆக்‌ஷன் திரில்லர் பாணியில் உருவாகியுள்ள இப்படத்தின் சில முக்கிய காட்சிகள் திருவண்ணாமலை மற்றும் மலேசியா உள்ளிட்ட இடங்களில் படமாக்கப்பட்டுள்ளன.

வுண்டர்பார் ஃபிலிம்ஸ் மற்றும் ஆர் டேக் ஸ்டுடியோஸ் நிறுவனங்கள் இணைந்து தயாரிக்கும் இப்படத்திற்கு சாய் அபயங்கர் இசையமைத்துள்ளார்.

நவம்பர் 20-ஆம் தேதி திரைப்படம் வெளியீடு

‘ஓம்’ திரைப்படம் முதலில் அக்டோபர் 16-ஆம் தேதி வெளியாகும் என அறிவிக்கப்பட்டிருந்தது. பின்னர் வெளியீட்டுத் தேதி மாற்றப்பட்டு நவம்பர் 20-ஆம் தேதி உலகம் முழுவதும் திரையரங்குகளில் வெளியாகும் எனப் படக்குழு அறிவித்துள்ளது.

இப்படத்தின் முதல் பாடலான ‘அலாக்கா லோவா’ மற்றும் இரண்டாவது பாடலான ‘வீழா வீரா’ ஆகியவை வெளியாகி ரசிகர்களிடையே வரவேற்பைப் பெற்றுள்ளன. இதனைத் தொடர்ந்து, திரைப்படத்தின் முழு இசைத்தொகுப்பையும் வெளியிடும் வகையில் இன்று பிரமாண்ட இசை வெளியீட்டு விழா ஏற்பாடு செய்யப்பட்டுள்ளது.

ரசிகர்கள் வைத்துள்ள பேனர்களால் பரபரப்பு

இசை வெளியீட்டு விழா நடைபெறும் கல்லூரி வளாகத்தில் தனுஷை வரவேற்கும் வகையில் பல்வேறு பிரமாண்டமான பேனர்கள் வைக்கப்பட்டுள்ளன.

குறிப்பாக, தனுஷின் நற்பணி இயக்கத்தைச் சேர்ந்த ரசிகர்கள் வைத்துள்ள பேனர்களில் இடம்பெற்றுள்ள அரசியல் சார்ந்த வாசகங்கள் தற்போது கவனத்தை ஈர்த்துள்ளன. அதில் ‘எங்கள் இயக்கத்தின் முதல்வரே’ என்ற வாசகம் இடம்பெற்றிருப்பது சினிமா மற்றும் அரசியல் வட்டாரங்களில் விவாதத்தை ஏற்படுத்தியுள்ளது.

ஏற்கெனவே தனுஷின் ''அரசியல் வருகை குறித்து'' பல்வேறு தகவல்கள் மற்றும் யூகங்கள் சமூக வலைதளங்களில் பரவி வரும் நிலையில், இந்த பேனர்கள் கூடுதல் கவனத்தைப் பெற்றுள்ளன. இருப்பினும், அரசியல் தொடர்பான எந்தவொரு அதிகாரப்பூர்வ அறிவிப்பும் வெளியாகவில்லை.

தனுஷின் பேச்சுக்கு ரசிகர்கள் எதிர்பார்ப்பு

இந்த இசை வெளியீட்டு விழாவில் நடிகர் 'தனுஷ்' மேடையில் பேசவுள்ள கருத்துகள் குறித்து ரசிகர்கள் மிகுந்த ஆர்வத்துடன் காத்திருக்கின்றனர்.

தனது திரைப்பயணம், ‘ஓம்’ திரைப்படத்தின் உருவாக்கம், படக்குழுவினருடனான அனுபவங்கள் மற்றும் எதிர்காலத் திரைப்படத் திட்டங்கள் குறித்து அவர் பேசுவார் என எதிர்பார்க்கப்படுகிறது.

மேலும், ரசிகர்கள் மத்தியில் எழுந்துள்ள அரசியல் தொடர்பான கேள்விகளுக்கு தனுஷ் ஏதேனும் பதிலளிப்பாரா என்ற எதிர்பார்ப்பும் அதிகரித்துள்ளது. இதனால் திரைப்படத்தின் இசை வெளியீட்டு விழாவைத் தாண்டி தனுஷின் மேடைப் பேச்சும் முக்கியத்துவம் பெற்றுள்ளது.

பலத்த பாதுகாப்பு ஏற்பாடுகள்

விழாவில் அதிக அளவில் ரசிகர்கள் கலந்துகொள்வார்கள் என எதிர்பார்க்கப்பட்டதால் காவல்துறை சார்பில் பலத்த பாதுகாப்பு ஏற்பாடுகள் மேற்கொள்ளப்பட்டுள்ளன.

அனுமதி பாஸ் பெற்றவர்களுக்கு மட்டுமே நிகழ்ச்சி நடைபெறும் பகுதிக்குள் அனுமதி வழங்கப்படுகிறது. கூட்ட நெரிசலைக் கட்டுப்படுத்தவும், ரசிகர்களின் பாதுகாப்பை உறுதி செய்யவும் காவல்துறையினர் மற்றும் நிகழ்ச்சி ஏற்பாட்டாளர்கள் இணைந்து பல்வேறு நடவடிக்கைகளை மேற்கொண்டுள்ளனர்