மேட்டூர் அணை திறப்பு, காவிரி விவகாரம்: வேளாண் மற்றும் நீர்வளத்துறை அதிகாரிகளுடன் முதல்வர் விஜய் அதிரடி ஆலோசனை!
மேட்டூர் அணை நீர் திறப்பு, காவிரி நீர் விவகாரம், குறுவை சாகுபடி மற்றும் நீர்நிலைகள் தூர்வாருதல் குறித்து வேளாண்மை மற்றும் நீர்வளத்துறை அதிகாரிகளுடன் முதலமைச்சர் விஜய் அவசர ஆலோசனை நடத்தினார்.
தமிழகத்தில் விவசாயப் பணிகள் மற்றும் நீர் மேலாண்மையை முறைப்படுத்துவது குறித்து முதலமைச்சர் விஜய் இன்று தலைமைச் செயலகத்தில் அவசர ஆலோசனை மேற்கொண்டார். இந்த உயர் மட்டக் கூட்டத்தில் வேளாண்மைத்துறை மற்றும் நீர்வளத்துறை சார்ந்த முக்கிய அதிகாரிகள், செயலாளர்கள் கலந்து கொண்டனர்.
இந்த ஆலோசனைக் கூட்டத்தில், வரவிருக்கும் பாசனக் காலத்தை முன்னிட்டு மேட்டூர் அணையைத் திறப்பது குறித்தும், டெல்டா மாவட்டங்களின் பாசனத் தேவைகள் குறித்தும் விரிவாக விவாதிக்கப்பட்டது. மேலும், அண்டை மாநிலத்துடனான காவிரி நீர் பகிர்வு விவகாரத்தில் தமிழகத்தின் தற்போதைய நிலைப்பாடு மற்றும் சட்டப்பூர்வ நடவடிக்கைகள் குறித்தும் முதலமைச்சர் அதிகாரிகளுடன் கேட்டறிந்தார்.
டெல்டா மற்றும் இதர மாவட்டங்களில் குறுவை சாகுபடிப் பணிகளைத் தடையின்றி மேற்கொள்வதற்கான உத்திகள் குறித்து இக்கூட்டத்தில் ஆலோசிக்கப்பட்டது. குறிப்பாக, விவசாயிகளுக்குத் தேவையான தரமான விதைகள், உரங்கள் தடையின்றிக் கிடைப்பதை உறுதி செய்யவும், எதிர்பாராத இயற்கை சீற்றங்களால் ஏற்படும் இழப்புகளில் இருந்து விவசாயிகளைப் பாதுகாக்க 'பயிர் காப்பீட்டுத் திட்டத்தை' (Crop Insurance) தீவிரமாகச் செயல்படுத்துவது குறித்தும் முதலமைச்சர் விஜய் அறிவுறுத்தல்களை வழங்கினார்.
மழைக்காலம் தொடங்குவதற்கு முன்னதாகவே தமிழகத்தில் உள்ள முக்கிய ஆறுகள், கால்வாய்கள், ஏரிகள் மற்றும் பாசனக் குளங்களைத் தூர்வாரும் (Desilting) பணிகளை விரைந்து முடிக்க உத்தரவிடப்பட்டுள்ளது. நீர்நிலைகளைத் தூர்வாருவதன் மூலம் நிலத்தடி நீர்மட்டத்தை உயர்த்தவும், விவசாயத்திற்குத் தடையின்றி நீர் போய் சேருவதையும் உறுதி செய்ய வேண்டும் என முதலமைச்சர் அதிகாரிகளுக்குக் கறாரான உத்தரவுகளைப் பிறப்பித்துள்ளார்.
0 Comments
No comments yet. Be the first to comment.