தமிழ்நாடு முதலமைச்சர் விஜய் முன்னிலையில் லண்டனில் பல்வேறு முன்னணி உலகளாவிய நிறுவனங்களுடன் மேற்கொள்ளப்பட்ட புரிந்துணர்வு ஒப்பந்தங்கள் மற்றும் முதலீட்டு முன்மொழிவுகள் மூலம் தமிழ்நாட்டில் ரூ.15,300 கோடிக்கும் அதிகமான முதலீடுகள் கிடைக்கவுள்ளதாகவும், இதன் மூலம் 10,000-க்கும் மேற்பட்ட நபர்களுக்கு நேரடி மற்றும் மறைமுக வேலைவாய்ப்புகள் உருவாகும் என்றும் தமிழ்நாடு அரசு தெரிவித்துள்ளது.

இந்தியாவிலிருந்து நாட்டிற்கான இந்தியத் தூதர் சந்திப்பு

லண்டனில் 12.9.2026 அன்று தமிழ்நாடு முதலமைச்சர் அவர்கள் இங்கிலாந்து நாட்டிற்கான இந்தியத் தூதர் குமரன் பெரியசாமி I.F.S. அவர்களை சந்தித்து, இந்தியா–பிரிட்டன் விரிவான பொருளாதார மற்றும் வர்த்தக ஒப்பந்தத்தின் (CETA) பின்னணியில், தமிழ்நாட்டில் பிரிட்டனுடன் மேற்கொள்ளக்கூடிய வர்த்தக வாய்ப்புகள் மற்றும் கூட்டாண்மைகள் குறித்து கலந்துரையாடினார்.

சில்வர்ஸ்டோன் மோட்டார் ரேசிங் சர்க்யூட் பார்வையிட்டு, 2026 மிச்செலின் லீ மான்ஸ் கோப்பை கார் பந்தயத்தை தொடங்கி வைத்தார்.

தமிழ்நாடு சட்டமன்றப் பேரவையில் கடந்த 3.9.2026 அன்று விதி எண் 110-ன் கீழ், தமிழ்நாடு முதலமைச்சர் அவர்கள் உலகத்தரம் வாய்ந்த மோட்டார் ஸ்போர்ட் நகரம் (Motor Sports City) தமிழ்நாட்டில் அமைக்கப்படும் என்று அறிவித்திருந்தார்.

அந்த அறிவிப்பினை செயல்படுத்தும் வகையில், தமிழ்நாடு முதலமைச்சர் அவர்கள் இங்கிலாந்து நாட்டின் புகழ்பெற்ற சில்வர்ஸ்டோன் மோட்டார் ரேசிங் சர்க்யூட்டிற்குச் சென்று அங்குள்ள Race Control மற்றும் Race Circuit பகுதிகளை பார்வையிட்டார்.

மேலும், சால்வதேச் அவலிலான நீண்டதர கார் பந்தயத்தை நடத்துவதற்குத் தேவையான நவீன தொழில்நுட்பங்கள், செயல்பாட்டு ஏற்பாடுகள் மற்றும் பாதுகாப்பு அமைப்புகள் குறித்தும் கேட்டறிந்தார்.

அதனைத் தொடர்ந்து சில்வர்ஸ்டோன் கிராண்ட் பிரிக்ஸ் பந்தயத் திடலில் முன்னணி நடிகர் அஜித் குமார் பங்கேற்ற 2026 மிச்செலின் லீ மான்ஸ் கோப்பை கார் பந்தயத்தை தமிழ்நாடு முதலமைச்சர் அவர்கள் கொடியசைத்துத் தொடங்கி வைத்தார்.

தொழில் முதலீட்டிற்கான புரிந்துணர்வு ஒப்பந்தங்கள்

தமிழ்நாடு முதலமைச்சர் அவர்கள் முன்னிலையில் லண்டனில் 14.09.2026 அன்று வாகன உதிரிபாக உற்பத்தி, ஆராய்ச்சி மற்றும் மேம்பாடு, புதுப்பிக்கத்தக்க ஆற்றல் மற்றும் மின்கட்டமைப்பு உபகரணங்கள் மற்றும் உலகளாவிய திறன் மையங்கள் (Global Capability Centres) ஆகியவற்றை உள்ளடக்கிய புரிந்துணர்வு ஒப்பந்தங்கள் மேற்கொள்ளப்பட்டன.

புதிய தொழில் முதலீட்டிற்கான விருப்பக் கடிதங்கள் மற்றும் புரிந்துணர்வு ஒப்பந்தங்கள் மூலம் மொத்தம் ரூ.15,300 கோடிக்கும் அதிகமான முதலீடுகள் தமிழ்நாட்டிற்கு வருவதற்கான வாய்ப்பு உருவாகியுள்ளது.

இதன் மூலம் 10,000-க்கும் மேற்பட்ட நபர்களுக்கு நேரடி மற்றும் மறைமுக வேலைவாய்ப்புகள் உருவாக்கப்படும் என எதிர்பார்க்கப்படுகிறது.

சம்வர்தனா மதர்சன் இன்டர்நேஷனல் நிறுவனத்துடன் புரிந்துணர்வு ஒப்பந்தம்

45-க்கும் மேற்பட்ட நாடுகளில் செயல்பட்டு வரும் முன்னணி பன்னாட்டு நிறுவனமான சம்வர்தனா மதர்சன் இன்டர்நேஷனல் லிமிடெட் (Samvardhana Motherson International Ltd.), தமிழ்நாட்டில் தனது செயல்பாடுகளை மேலும் விரிவுபடுத்த திட்டமிட்டுள்ளது.

அந்நிறுவனம் தனது பிரிட்டன் மற்றும் ஐரோப்பிய கூட்டு நிறுவனங்கள் மற்றும் தொழில்நுட்பக் கூட்டாளர்களுடன் இணைந்து தமிழ்நாட்டின் பல்வேறு பகுதிகளில் வடிவமைப்பு, பொறியியல், உற்பத்தி, ஒருங்கிணைப்பு மற்றும் தளவாடங்கள் சார்ந்த வசதிகளை நிறுவுவதற்கான நடவடிக்கைகளை மேற்கொள்ள உள்ளது.

இந்தப் புரிந்துணர்வு ஒப்பந்தத்தின் கீழ், மதர்சன் குழுமம் சுமார் ரூ.11,000 கோடி மதிப்பிலான புதிய முதலீட்டு வாய்ப்புகளை தமிழ்நாட்டில் உருவாக்க திட்டமிட்டுள்ளது.

இதன் மூலம் சுமார் 7,000 வேலைவாய்ப்புகள் உருவாகும் என தெரிவிக்கப்பட்டுள்ளது.

இந்த முதலீடுகள் தமிழ்நாட்டின் வாகன உதிரிபாக உற்பத்தி மற்றும் அதனுடன் தொடர்புடைய தொழில்துறைகளின் வளர்ச்சிக்கு பங்களிக்கும் வகையில் அமையும் என தெரிவிக்கப்பட்டுள்ளது. 

தமிழ்நாட்டில் உலகளாவிய திறன் மையங்களை அமைத்திட புரிந்துணர்வு ஒப்பந்தங்கள்

தமிழ்நாட்டில் உலகளாவிய திறன் மையங்களை (Global Capability Centres – GCCs) நிறுவுவதற்கும், ஏற்கனவே உள்ள திறன் மையங்களை விரிவுபடுத்துவதற்கும் இரண்டு முக்கிய புரிந்துணர்வு ஒப்பந்தங்கள் மேற்கொள்ளப்பட்டன.

சிக்மா டெக்னாலஜி

ஸ்வீடனைச் சேர்ந்த சிக்மா டெக்னாலஜி குழுமம் (Sigma Technology Group), எம்பெடட் சிஸ்டம்ஸ், மின்மயமாக்கல் மற்றும் தொழில்துறை டிஜிட்டல்மயமாக்கல் ஆகிய துறைகளில் தனது செயல்பாடுகளை விரிவுபடுத்த திட்டமிட்டுள்ளது.

திருச்சிராப்பள்ளி மற்றும் சென்னையில் உள்ள தனது உலகளாவிய திறன் மையங்களை, இந்திய நிறுவனமான ஸ்ரியா சொல்யூஷன்ஸ் மூலம் விரிவுபடுத்துவதற்காக தமிழ்நாடு அரசின் வழிகாட்டி நிறுவனத்துடன் புரிந்துணர்வு ஒப்பந்தம் மேற்கொள்ளப்பட்டுள்ளது.

இதன் மூலம் சுமார் 600 உயர் மதிப்பு வேலைவாய்ப்புகள் உருவாகும் என எதிர்பார்க்கப்படுகிறது.

உலகளாவிய திறன் மையம் – எர்ன்ஸ்ட் & யங்

எர்ன்ஸ்ட் & யங் (Ernst & Young) நிறுவனம் ஒரு சர்வதேச நிறுவனத்திற்காக தமிழ்நாட்டில் உலகளாவிய திறன் மையத்தை (Global Capability Centre) அமைக்கும் வகையில் தமிழ்நாடு அரசின் வழிகாட்டி நிறுவனத்துடன் புரிந்துணர்வு ஒப்பந்தம் மேற்கொண்டுள்ளது.

Build – Operate – Transform – Transfer (BOTT) ஏற்பாட்டின் கீழ் இந்த மையத்தை நிறுவுவதற்கான நடவடிக்கைகள் மேற்கொள்ளப்பட உள்ளன.

இந்த உலகளாவிய திறன் மையம் சுமார் ரூ.1,000 கோடி முதலீட்டில் அமையவுள்ளது.

இதன் மூலம் 2,000-க்கும் மேற்பட்ட உயர் மதிப்புள்ள புதிய வேலைவாய்ப்புகள் உருவாகும் என எதிர்பார்க்கப்படுகிறது.

சென்னையில் உள்ள மவுண்ட் – பூந்தமல்லி சாலைப் பகுதியில் இந்த GCC அமைக்கப்பட உள்ளதாக தெரிவிக்கப்பட்டுள்ளது.

வில்சன் பவர் சொல்யூஷன்ஸ்

பிரிட்டனைத் தலைமையிடமாகக் கொண்ட வில்சன் பவர் சொல்யூஷன்ஸ் (Wilson Power Solutions) நிறுவனம் தமிழ்நாட்டில் மின்மாற்றி மற்றும் மின்கட்டமைப்பு தொடர்பான உபகரணங்கள் தயாரிப்பை விரிவுபடுத்த திட்டமிட்டுள்ளது.

திருவள்ளூர் மாவட்டத்தில் சுமார் ரூ.300 கோடி முதலீட்டில் புதிய உற்பத்தி வசதியை உருவாக்குவதற்கான திட்டம் மேற்கொள்ளப்பட்டுள்ளது.

இதன் மூலம் சுமார் 400 புதிய வேலைவாய்ப்புகள் உருவாகும் என எதிர்பார்க்கப்படுகிறது. 

ஐரோப்பிய வாகன உதிரிபாக நிறுவனத்தின் முதலீட்டு விருப்பம்

ஐரோப்பாவைச் சேர்ந்த முன்னணி வாகன உதிரிபாகங்கள் தயாரிப்பு நிறுவனம் ஒன்று, இந்தியாவில் தான் மேற்கொள்ளவிருக்கும் புதிய உற்பத்தி ஆலையை தமிழ்நாட்டில் அமைக்க விருப்பம் தெரிவித்துள்ளது.

இந்தியாவில் அந்த நிறுவனத்தின் முதல் புதிய உற்பத்தி ஆலையை தமிழ்நாட்டில் அமைப்பதற்கான விருப்பக் கடிதம் (Letter of Intent) வழங்கப்பட்டுள்ளது.

இந்தத் திட்டத்தின் கீழ் சுமார் ரூ.3,000 கோடி முதலீடு மேற்கொள்ளப்படவுள்ளதாக தெரிவிக்கப்பட்டுள்ளது.

ஹிந்துஜா குழுமத்தின் தலைமை நிர்வாகிகளுடன் சந்திப்பு

அசோக் லேலண்ட் நிறுவனத்தின் நிர்வாகத் தலைவர் தீரஜ் ஹிந்துஜா, ஃபினோலெக்ஸ் இண்டஸ்ட்ரீஸ் லிமிடெட் நிறுவனத்தின் நிர்வாகத் தலைவர் பிரகாஷ் பி. சாப்ரியா, இயக்குநர் ரீட்டா ஹிந்துஜா சாப்ரியா மற்றும் ஹிந்துஜா குழுமத்தைச் சேர்ந்த அதிகாரிகள் ஆகியோர் லண்டனில் தமிழ்நாடு முதலமைச்சரை சந்தித்தனர்.

இந்தச் சந்திப்பின்போது, தமிழ்நாட்டில் ஹிந்துஜா குழுமம் மேற்கொண்டு வரும் முதலீடுகளின் தற்போதைய முன்னேற்றம் குறித்து முதலமைச்சரிடம் விளக்கப்பட்டது.

குறிப்பாக, ஆகஸ்ட் 2026-ல் நடைபெற்ற VETTRI தமிழ்நாடு முதலீட்டாளர்கள் மாநாட்டில் மேற்கொள்ளப்பட்ட ரூ.2,500 கோடி மதிப்பிலான புரிந்துணர்வு ஒப்பந்தத்தின் அடிப்படையில் மேற்கொள்ளப்பட்டு வரும் நடவடிக்கைகள் குறித்து விவாதிக்கப்பட்டது.

தமிழ்நாட்டில் தொடர்ந்து முதலீடு செய்வதற்கும், தனது வணிகத்தை மேலும் விரிவுபடுத்துவதற்கும் ஹிந்துஜா குழுமம் கொண்டுள்ள உறுதிப்பாடு குறித்தும் தெரிவிக்கப்பட்டது.

அரசின் முழு ஆதரவு

பிரிட்டன் மற்றும் ஐரோப்பிய நிறுவனங்கள் தமிழ்நாட்டில் முதலீடு செய்யவும், தமிழ்நாட்டுடன் வர்த்தக மற்றும் வணிகத் தொடர்புகளை மேலும் ஆழப்படுத்தவும் தமிழ்நாடு முதலமைச்சர் அழைப்பு விடுத்தார்.

முதலீடுகளை எளிதாக்குவதற்கும், மாநிலத்தில் நிறுவனங்களின் வணிகங்களை வெற்றிகரமாக நிறுவி செயல்படுத்துவதற்கும் தேவையான அரசின் முழு ஆதரவும் ஒத்துழைப்பும் வழங்கப்படும் என முதலீட்டாளர்களிடம் உறுதியளிக்கப்பட்டது.

தமிழ்நாட்டின் தொழில்துறை கட்டமைப்பு, திறன்மிக்க மனிதவளம், முதலீட்டுக்கு ஏற்ற சூழல் மற்றும் பல்வேறு துறைகளில் உள்ள வாய்ப்புகள் குறித்து நிறுவனங்களுடன் கலந்துரையாடல்கள் மேற்கொள்ளப்பட்டன.

முன்னணி நிறுவனங்களின் தலைமை நிர்வாகிகளுடன் சந்திப்பு

தமிழ்நாடு முதலமைச்சரின் சந்திப்புகளுடன், தமிழ்நாடு அரசின் வழிகாட்டி (Guidance TamilNadu) நிறுவனமும் அரசு உயர் அலுவலர்களும் பல்வேறு முன்னணி நிறுவனங்கள் மற்றும் பங்குதாரர்களுடன் தொடர்ந்து கலந்துரையாடல்களை நடத்தினர்.

விண்வெளி மற்றும் பாதுகாப்பு, இரசாயனங்கள், தளவாடங்கள், கட்டுமானம், நிதிச் சேவைகள், சில்லறை வர்த்தகம் மற்றும் சட்ட சேவைகள் உள்ளிட்ட பல்வேறு துறைகளைச் சேர்ந்த 10 முன்னணி நிறுவனங்கள் மற்றும் பங்குதாரர்களுடன் இந்த கலந்துரையாடல்கள் நடைபெற்றன.

இந்தக் கலந்துரையாடல்களின் மூலம் பல்வேறு வர்த்தக மற்றும் தொழில் வாய்ப்புகள் குறித்து விவாதிக்கப்பட்டன.

பிரிட்டன் – தமிழ்நாடு வர்த்தக வாய்ப்புகள்

பிரிட்டன் வர்த்தக நிறுவனங்களுக்கும் தமிழ்நாட்டின் ஜவுளி மற்றும் ஆடை உற்பத்தியாளர்களுக்கும் இடையேயான மூலப்பொருட்கள் கொள்முதல் ஒப்பந்தங்கள் குறித்தும் கலந்துரையாடப்பட்டது.

மேலும், தமிழ்நாட்டின் தொழில் நிறுவனங்களுக்கு சர்வதேச சந்தைகளில் புதிய வாய்ப்புகளை உருவாக்கும் வகையில் வர்த்தக தொடர்புகளை மேம்படுத்துவது குறித்தும் ஆலோசிக்கப்பட்டது.

ஓசூருக்கு இங்கிலாந்து விண்வெளி மற்றும் பாதுகாப்புத் துறை பிரதிநிதிகள் குழுவின் வருகை குறித்தும் வாய்ப்புகள் ஆய்வு செய்யப்பட்டன.

அக்டோபர் மாதத்தில் சென்னைக்கு இங்கிலாந்து மேயர் ஆணையத்தின் பிரதிநிதிகள் குழு வருகை தருவதற்கான வாய்ப்புகள் குறித்தும் கலந்துரையாடப்பட்டது.

நிதிச் சேவைத் துறைக்கான திறன் மேம்பாட்டுக் கூட்டாண்மைகள் மற்றும் வர்த்தகம், ஏற்றுமதி தொடர்பான பயிலரங்குகள் நடத்துவது குறித்தும் நடவடிக்கைகள் மேற்கொள்ளப்பட உள்ளன. 

பிரிட்டன் – இந்தியா விரிவான பொருளாதார மற்றும் வர்த்தக ஒப்பந்தம்

பிரிட்டன் – இந்தியா விரிவான பொருளாதார மற்றும் வர்த்தக ஒப்பந்தத்தின் மூலம் தமிழ்நாட்டிற்கு உருவாகக்கூடிய புதிய வர்த்தக மற்றும் முதலீட்டு வாய்ப்புகளை அடையாளம் காண்பது குறித்தும் ஆலோசிக்கப்பட்டது.

இதன் மூலம் தமிழ்நாட்டின் ஏற்றுமதி நிறுவனங்கள் மற்றும் உற்பத்தித் துறைகளுக்கு சர்வதேச சந்தைகளில் கிடைக்கக்கூடிய வாய்ப்புகளை அடையாளம் காண்பதற்கான நடவடிக்கைகள் மேற்கொள்ளப்பட உள்ளன.

தமிழ்நாட்டின் தொழில் நிறுவனங்களுக்கும் பிரிட்டன் நிறுவனங்களுக்கும் இடையேயான வர்த்தக உறவுகளை மேலும் வலுப்படுத்துவதற்கான நடவடிக்கைகளும் தொடர்ந்து மேற்கொள்ளப்பட உள்ளதாக தெரிவிக்கப்பட்டுள்ளது.

தமிழ்நாடு முதலமைச்சரின் நன்றி

லண்டன் பயணத்தின் போது தமிழ்நாடு முதலமைச்சர் அவர்கள் அங்கு வசிக்கும் தமிழர்களையும் சந்திக்க திட்டமிட்டிருந்தார்.

எனினும், சில நிகழ்வுகளில் ஏற்பட்ட அனுமதி மற்றும் ஏற்பாடுகள் காரணமாக புலம்பெயர்ந்த தமிழர்களை நேரில் சந்திக்க முடியாத நிலை ஏற்பட்டதற்கு அவர் வருத்தம் தெரிவித்தார்.

லண்டனில் தமக்கு ஆதரவு வழங்கிய தமிழ் மக்களுக்கும், இந்திய தூதரகத்தினருக்கும், அரசு அதிகாரிகளுக்கும் அவர் நன்றி தெரிவித்தார்.

மேலும், லண்டன் பயணத்தின் போது முதலீட்டு நிறுவனங்களுடன் மேற்கொள்ளப்பட்ட சந்திப்புகள் மற்றும் ஒப்பந்தங்களை ஒருங்கிணைக்க உதவிய அதிகாரிகள் மற்றும் நிறுவனங்களின் நிர்வாகிகளுக்கும் நன்றி தெரிவிக்கப்பட்டது.

தொழில் வளர்ச்சிக்கான அடுத்தகட்ட நடவடிக்கைகள்

தமிழ்நாட்டில் புதிய தொழில்களை உருவாக்குவதோடு மட்டுமல்லாமல், ஏற்கனவே செயல்பட்டு வரும் நிறுவனங்களின் விரிவாக்கத்திற்கும் இந்த முதலீட்டு நடவடிக்கைகள் உதவும் என எதிர்பார்க்கப்படுகிறது.

வாகன உதிரிபாக உற்பத்தி, ஆராய்ச்சி மற்றும் மேம்பாடு, புதுப்பிக்கத்தக்க ஆற்றல், மின்கட்டமைப்பு உபகரணங்கள், எம்பெடட் சிஸ்டம்ஸ், தொழில்துறை டிஜிட்டல்மயமாக்கல் மற்றும் உலகளாவிய திறன் மையங்கள் போன்ற பல்வேறு துறைகளில் புதிய முதலீடுகள் உருவாகும் வகையில் நடவடிக்கைகள் மேற்கொள்ளப்பட்டுள்ளன.

இதன் மூலம் தமிழ்நாட்டின் தொழில் வளர்ச்சிக்கு புதிய வாய்ப்புகள் உருவாகுவதுடன், இளைஞர்களுக்கு உயர்தரமான வேலைவாய்ப்புகளும் உருவாகும் என தெரிவிக்கப்பட்டுள்ளது.

தமிழ்நாட்டின் திறன்மிக்க மனிதவளம், சிறந்த உட்கட்டமைப்பு வசதிகள் மற்றும் தொழில் தொடங்குவதற்கான சூழலை பயன்படுத்தி மேலும் பல சர்வதேச நிறுவனங்களை மாநிலத்திற்கு ஈர்ப்பதற்கான நடவடிக்கைகள் தொடரும் என அரசு தெரிவித்துள்ளது.