வங்கக்கடலில் உருவானது புதிய காற்றழுத்த தாழ்வுப் பகுதி: 3 மாவட்டங்களுக்கு ஆரஞ்சு எச்சரிக்கை!
தென்மேற்கு வங்கக்கடலில் புதிய காற்றழுத்த தாழ்வுப் பகுதி உருவாகியுள்ளதாக இந்திய வானிலை மையம் தெரிவித்துள்ளது. இதன் தாக்கத்தால் தமிழகத்தின் கடலோர மற்றும் டெல்டா மாவட்டங்களில் பரவலாக மழைக்கு வாய்ப்புள்ள நிலையில், இன்று தூத்துக்குடி, திருநெல்வேலி, கன்னியாகுமரி ஆகிய 3 மாவட்டங்களுக்கு மிகக் கனமழைக்கான ‘ஆரஞ்சு’ எச்சரிக்கை விடுக்கப்பட்டுள்ளது.
தமிழகம் முழுவதும் வடகிழக்கு பருவமழை தீவிரமடைந்துள்ள நிலையில், சென்னை உள்ளிட்ட வட தமிழக கடலோர மாவட்டங்களில் தொடர்ந்து கனமழை பெய்து வருகிறது. இந்தச் சூழலில், வானிலை தொடர்பான புதிய அறிவிப்பை இந்திய வானிலை ஆய்வு மையம் வெளியிட்டுள்ளது.
தென்மேற்கு வங்கக்கடல் மற்றும் அதனை ஒட்டிய தமிழக கடலோரப் பகுதிகளில் நிலவி வந்த வளிமண்டல மேலடுக்கு சுழற்சியானது தற்போது காற்றழுத்த தாழ்வுப் பகுதியாக வலுப்பெற்றுள்ளது. இந்தக் காற்றழுத்த தாழ்வுப் பகுதி மேற்கு - வடமேற்கு திசையை நோக்கி நகரும் என கணிக்கப்பட்டுள்ளது. இதன் விளைவாக, தமிழகத்தின் கடலோர மற்றும் டெல்டா மாவட்டங்களில் பரவலாக மழை பெய்யக்கூடும் எனத் தெரிவிக்கப்பட்டுள்ளது.
மழையின் தீவிரம் காரணமாக, இன்று (அக்டோபர் 21) தூத்துக்குடி, திருநெல்வேலி மற்றும் கன்னியாகுமரி ஆகிய மூன்று மாவட்டங்களில் மிகக் கனமழை பெய்ய வாய்ப்புள்ளதால், இந்த மாவட்டங்களுக்கு வானிலை மையம் 'ஆரஞ்சு' எச்சரிக்கை விடுத்துள்ளது. மேலும், வருகிற அக்டோபர் 23-ஆம் தேதியன்று வங்கக்கடலில் புதிதாக மற்றொரு காற்றழுத்த தாழ்வுப் பகுதி உருவாக வாய்ப்புள்ளதாகவும் வானிலை ஆய்வு மையம் கணித்துள்ளது.
0 Comments
No comments yet. Be the first to comment.