"முதல்வராக வரவில்லை, உங்கள் அண்ணனாக வந்துள்ளேன்!" - மாணவர்களுக்கு விருது வழங்கி முதல்வர் விஜய் நெகிழ்ச்சி உரை

சென்னை நீலாங்கரையில் உள்ள ஆர்.கே. கன்வென்ஷன் சென்டரில், தமிழக வெற்றிக் கழகம் (தவெக) சார்பில் 10 மற்றும் 12-ஆம் வகுப்பு பொதுத்தேர்வில் அதிக மதிப்பெண்கள் பெற்ற மாணவர்களுக்கு பாராட்டு விழா நடைபெற்றது. இந்த விழாவில் தமிழக முதலமைச்சர் விஜய் கலந்துகொண்டு, சாதனை படைத்த மாணவ, மாணவிகளுக்கு சான்றிதழ்கள் மற்றும் ஊக்கத்தொகைகளை வழங்கி சிறப்பித்தார். எதிர்கால சமுதாயத்தின் கல்வி மற்றும் வளர்ச்சியில் சிறப்பு கவனம் செலுத்தும் நோக்கிலும், மாணவர்களை ஊக்குவிக்கும் வகையிலும் இந்தப் பிரம்மாண்ட விழா ஏற்பாடு செய்யப்பட்டிருந்தது.

இந்த விழாவில் மேடையேறிய முதல்வர் விஜய், நெகிழ்ச்சியான பல கருத்துகளைப் பகிர்ந்துகொண்டார். "என் நெஞ்சில் குடியிருக்கும் அன்பான செல்லங்கள், நண்பா, நண்பீஸ், பெற்றோருக்கு வணக்கம்; உங்கள் அன்பைப் பெறும் இப்படிப்பட்ட ஒரு வரத்தைக் கொடுத்த கடவுளுக்கு நன்றி சொல்கிறேன்," என்று அவர் கூறினார். மேலும், "ஒரு முதல்வராக இந்த நிகழ்ச்சிக்கு நான் வரவில்லை; உங்கள் அண்ணனாக வந்திருக்கிறேன். உங்களுக்கும் சேர்த்துதான் நான் அரசியலுக்கு வந்துள்ளேன்; நான் இங்கு அரசியல் பேச வரவில்லை," என்று கூறி அங்கிருந்தவர்களின் நெஞ்சங்களில் இடம்பிடித்தார்.

மாணவர்களைக் கவுரவிக்கும் இந்த நிகழ்வில், 12-ஆம் வகுப்பு பொதுத்தேர்வில் மாநில அளவிலேயே முதல் மதிப்பெண் பெற்றுச் சாதனை படைத்த மாணவி ரிக்‌ஷிதாவுக்கு, முதல்வர் விஜய் தனது அன்புப் பரிசாக ஒரு நெக்லஸை வழங்கி வாழ்த்தினார். மாணவச் செல்வங்களின் கல்விப் பயணத்திற்கு உறுதுணையாக இருப்பதே தனது தலையாய கடமை என்பதை உணர்த்தும் விதமாக அவரது செயல்பாடுகள் அமைந்திருந்தன. விருதுகள் பெற்ற மாணவர்களின் முகங்களில் பெருமிதமும் மகிழ்ச்சியும் காணப்பட்டது.

விருதுகளை வழங்கிய பின் மாணவர்களுக்குச் சில முக்கிய அறிவுரைகளையும் முதல்வர் விஜய் வழங்கினார். "மாணவர்களாகிய நீங்கள் லஞ்சம், போதைப்பொருள், ஊழல் பக்கம் சென்றுவிடாதீர்கள்; எதற்கும் அடிமையாகிவிடாதீர்கள்," என்று வலியுறுத்தினார். மேலும், "நீங்கள் அப்படி இருந்தால் உங்கள் நண்பர்களும் தவறு செய்ய யோசிப்பார்கள்," என்று சமூக அக்கறையோடு அவர் அறிவுறுத்தினார். அவரது இந்த வழிகாட்டுதல் உரை மாணவர்கள் மற்றும் பெற்றோர்கள் மத்தியில் பெரும் வரவேற்பைப் பெற்றது.