எம்மி விருது மேடையில் இந்தியாவின் முதல் நடிகர்... விஜய் சேதுபதிக்கு கிடைத்த கௌரவம்!

சென்னை,

சர்வதேச அளவில் புகழ்பெற்ற எம்மி விருது மேடையில் விருது வழங்கும் 'முதல் இந்திய நடிகர்'என்ற பெருமையைத் தமிழ் திரையுலகின் முன்னணி நடிகர் "விஜய் சேதுபதி" பெற உள்ளார். இந்த அறிவிப்பு அவரது ரசிகர்கள் மற்றும் திரையுலகினர் மத்தியில் மகிழ்ச்சியை ஏற்படுத்தியுள்ளது.

நியூயார்க்கில் 54-வது எம்மி விருது விழா

54-வது சர்வதேச எம்மி விருது விழா அமெரிக்காவின் நியூயார்க் நகரில் வரும் நவம்பர் 23-ஆம் தேதி நடைபெற உள்ளது. உலகின் பல்வேறு நாடுகளைச் சேர்ந்த தொலைக்காட்சித் தொடர்கள், நிகழ்ச்சிகள் மற்றும் பொழுதுபோக்குத் துறையினரின் படைப்புகள் இந்த விழாவில் அங்கீகரிக்கப்பட உள்ளன.

இந்த விழாவில் விருது வழங்கும் நிகழ்ச்சியில் பங்கேற்க நடிகர் விஜய் சேதுபதி அழைக்கப்பட்டுள்ளார். இதன் மூலம் சர்வதேச எம்மி விருது விழாவில் விருது வழங்கும் முதல் இந்திய நடிகர் என்ற வரலாற்றுச் சிறப்பை அவர் பெறுகிறார்.

இந்தியக் கலைஞர்களுக்கு கிடைக்கும் சர்வதேச அங்கீகாரம்

சர்வதேச எம்மி விருது மேடையில் இந்தியக் கலைஞர்களின் பங்களிப்பை அதிகரிப்பதில் தயாரிப்பாளர் கவிதா குப்தா முக்கியப் பங்காற்றியுள்ளார். சர்வதேச தொலைக்காட்சி கலை மற்றும் அறிவியல் அகாடமியின் நிர்வாகக் குழுவில் உறுப்பினராக உள்ள இவர், கடந்த 2024-ஆம் ஆண்டு நகைச்சுவை நடிகர் வீர்தாஸ் எம்மி விருது விழாவைத் தொகுத்து வழங்குவதற்கும் முக்கியக் காரணமாக இருந்தார்.

2023-ஆம் ஆண்டு தனது நகைச்சுவை நிகழ்ச்சிக்காக சர்வதேச எம்மி விருதைப் பெற்ற வீர்தாஸ், 2024-ஆம் ஆண்டு நடைபெற்ற 52-வது விழாவைத் தொகுத்து வழங்கிய முதல் இந்தியர் என்ற பெருமையைப் பெற்றார். தற்போது விஜய் சேதுபதிக்கு கிடைத்துள்ள இந்த வாய்ப்பு இந்தியத் திரையுலகிற்கு மேலும் ஒரு பெருமையாக அமைந்துள்ளது.

விஜய் சேதுபதியின் திரைப்பயணம்

தமிழ் சினிமாவில் தனித்துவமான கதாபாத்திரங்களைத் தேர்ந்தெடுத்து நடித்து வரும் விஜய் சேதுபதி, 'பீட்சா', 'நடுவுல கொஞ்சம் பக்கத்த காணோம்', 'சூது கவ்வும்', 'விக்ரம் வேதா', '96', 'சூப்பர் டீலக்ஸ்' உள்ளிட்ட பல திரைப்படங்கள் மூலம் ரசிகர்களின் கவனத்தைப் பெற்றவர்.

மேலும், 'பேட்ட', 'மாஸ்டர்', 'விக்ரம்', 'ஜவான்' போன்ற திரைப்படங்களில் வில்லன் கதாபாத்திரங்களிலும் தனது நடிப்புத் திறமையை வெளிப்படுத்தியுள்ளார். தமிழ் மட்டுமின்றி தெலுங்கு, இந்தி உள்ளிட்ட மொழிகளிலும் நடித்து தனது திரைப்பயணத்தை விரிவுபடுத்தியுள்ளார்.

குறிப்பாக, 2024-ஆம் ஆண்டு வெளியான 'மகாராஜா' திரைப்படம் அவருக்கு இந்திய அளவிலும் சர்வதேச அளவிலும் நல்ல வரவேற்பைப் பெற்றுத் தந்தது.

இந்தியப் படைப்புகளுக்கும் விருது வாய்ப்பு

இந்த ஆண்டுக்கான சர்வதேச எம்மி விருது விழாவில் இந்தியாவிலிருந்து இரண்டு படைப்புகள் முக்கியப் பிரிவுகளில் பரிந்துரைக்கப்பட்டுள்ளன. சோனி லிவ் தளத்தின் 'ரியல் காஷ்மீர் ஃபுட்பால் கிளப்' தொடர் சிறந்த நாடகத் தொடருக்கான பிரிவிலும், வீர்தாஸின் 'ஃபூல் வால்யூம்' நிகழ்ச்சி சிறந்த நகைச்சுவைத் தொடருக்கான பிரிவிலும் பரிந்துரைக்கப்பட்டுள்ளன.

இந்நிலையில், விஜய் சேதுபதியின் பங்கேற்பு இந்தியத் திரையுலகின் சர்வதேச அங்கீகாரத்தை மேலும் உயர்த்தும் என எதிர்பார்க்கப்படுகிறது