தவெக எம்.எல்.ஏ பேரம் பேசும் விவகாரம் , முன்னாள் அமைச்சர் செந்தில் பாலாஜி மற்றும் அவரது சகோதரர் மீது போலீஸ் விசாரணை!
தவெக எம்.எல்.ஏ-வை விலை பேசி, ஆட்சிக்கு நெருக்கடி கொடுக்க முயன்றதாகக் கூறப்படும் வழக்கில், முன்னாள் அமைச்சர் செந்தில் பாலாஜி மற்றும் அவரது சகோதரர் அசோக்குமார் மீது போலீஸ் விசாரணை தீவிரமடைந்துள்ளது.
புகாரும் கைது நடவடிக்கையும்
உத்தங்கரையைச் சேர்ந்த தவெக எம்.எல்.ஏ என். இளையராஜா, சட்டப்பேரவைத் தலைவர் மீதான நம்பிக்கை இல்லாத் தீர்மானத்தின்போது, தமக்கு ரூ.35 கோடி பேரம் பேசி மிரட்டல் விடுக்கப்பட்டதாக அளித்த புகாரின் அடிப்படையில் சென்னை காவல்துறை வழக்குப்பதிவு செய்தது. இந்த விவகாரத்தில் சம்பந்தப்பட்டதாகக் கூறப்படும் திருநாவுக்கரசு, நரேஷ் மற்றும் தியாகராஜன் ஆகிய மூவர் கைது செய்யப்பட்டுள்ளனர்.
செந்தில் பாலாஜி மற்றும் அசோக்குமாரின் பெயர் சிக்கல்
கைது செய்யப்பட்டவர்களிடம் நடத்தப்பட்ட விசாரணையில், முன்னாள் அமைச்சர் வி. செந்தில் பாலாஜி மற்றும் அவரது சகோதரர் வி. அசோக்குமார் ஆகியோரின் அறிவுறுத்தலின் பேரிலேயே இந்தச் செயலில் ஈடுபட்டதாகத் தகவல்கள் வெளியாகியுள்ளன. மேலும், அசோக்குமார் மற்றும் கைது செய்யப்பட்ட நரேஷ் ஆகியோர் சென்னையில் ரகசியமாகச் சந்தித்ததற்கான ஆதாரங்கள் சிக்கியுள்ளதாக காவல்துறை வட்டாரங்கள் தெரிவிக்கின்றன.
தொடரும் தேடுதல் வேட்டை
இதனையடுத்து, செந்தில் பாலாஜி மற்றும் அசோக்குமாரின் தொடர்புகள் குறித்து காவல்துறை தீவிர விசாரணை நடத்தி வருகிறது. கரூரில் உள்ள அவர்களுக்குச் சொந்தமான பண்ணை வீடுகள் மற்றும் பல்வேறு இடங்களில் காவல்துறையினர் சோதனை மேற்கொண்டு வருகின்றனர். இந்த விவகாரம் தமிழக அரசியலில் பெரும் பரபரப்பை ஏற்படுத்தியுள்ள நிலையில், இரு தரப்பினரும் ஒருவர் மீது ஒருவர் மாறி மாறி குற்றச்சாட்டுகளை அடுக்கி வருகின்றனர்.
0 Comments
No comments yet. Be the first to comment.