தமிழ்நாடு அரசின் வரவு-செலவுத் திட்டத்தைத் தயாரிக்கும் பணியின் ஒரு பகுதியாக, இன்று (ஜூலை 2) முதல் ஜூலை 22-ஆம் தேதி வரை முதலமைச்சர் விஜய் துறை வாரியான ஆய்வுக் கூட்டங்களை நடத்துகிறார்.
ஆய்வுக் கூட்டத்தின் நோக்கம்
தவெக அரசு ஆட்சிப் பொறுப்பேற்ற பிறகு தாக்கல் செய்யப்படவுள்ள முதல் பட்ஜெட் என்பதால், இதில் மக்கள் நலன் சார்ந்த முக்கியத் திட்டங்கள் மற்றும் புதிய அறிவிப்புகள் இடம்பெற வேண்டும் என்பதில் முதலமைச்சர் விஜய் மிகுந்த முனைப்பு காட்டி வருகிறார். வெளிப்படையான நிர்வாகம் மற்றும் ஒவ்வொரு துறையின் செயல்திறனை மேம்படுத்துவது குறித்து, அந்தந்த துறை அமைச்சர்கள் மற்றும் உயரதிகாரிகளுடன் அவர் விரிவாக ஆலோசனை நடத்த உள்ளார்.
முக்கிய அட்டவணை
இந்த ஆலோசனைக் கூட்டங்கள் இன்று தொடங்கி ஜூலை 22-ஆம் தேதி வரை நடைபெறுகின்றன. முதற்கட்டமாக இன்று (ஜூலை 2) கூட்டுறவு, உணவு மற்றும் நுகர்வோர் பாதுகாப்புத்துறை தொடர்பான ஆலோசனை நடைபெறுகிறது. தொடர்ந்து வரும் நாட்களில் தொழிலாளர் நலன், ஆதிதிராவிடர் நலன், தொழில் முதலீடு எனப் பல்வேறு துறைகளின் செயல்திறன் மற்றும் பட்ஜெட் ஒதுக்கீடு குறித்து ஆய்வு மேற்கொள்ளப்படும்.
பட்ஜெட் தாக்கல் எப்போது?
இந்த விரிவான ஆலோசனைக் கூட்டங்களுக்குப் பிறகு, பட்ஜெட் தயாரிப்புப் பணிகள் முழுமை பெறும். ஜூலை மாத இறுதி அல்லது ஆகஸ்ட் மாத முதல் வாரத்தில், தமிழக சட்டப்பேரவையில் முதலமைச்சர் விஜய் தலைமையிலான அரசின் முதல் பட்ஜெட் தாக்கல் செய்யப்பட வாய்ப்புள்ளதாக அரசு வட்டாரங்கள் தெரிவிக்கின்றன.
0 Comments
No comments yet. Be the first to comment.