ITR Filing 2026: ஜூலை 31 கடைசி தேதி... ரூ.8 லட்சம் விலக்கு இருந்தாலும் கவனம்! செய்யக் கூடாத 6 முக்கிய தவறுகள்!

2025-26 நிதியாண்டுக்கான ITR Filing 2026 தற்போது முழுவீச்சில் நடைபெற்று வருகிறது. சம்பளம் பெறும் வரி செலுத்துவோர் தங்களின் வருமான வரி கணக்கை (Income Tax Return - ITR) தாக்கல் செய்வதற்கான கடைசி தேதி ஜூலை 31, 2026 ஆகும். கடைசி நேர அவசரத்தில் கணக்கை தாக்கல் செய்யும்போது பலரும் அறியாமலேயே சில முக்கிய தவறுகளைச் செய்து விடுகின்றனர். அவை பின்னர் அபராதம், கூடுதல் வரிச்சுமை அல்லது நோட்டீஸ் போன்ற சிக்கல்களை ஏற்படுத்தக்கூடும்.

வரி செலுத்துவோர் கட்டாயம் கவனிக்க வேண்டிய 6 முக்கிய விஷயங்கள்:

1. கடைசி தேதிக்குள் ITR தாக்கல் செய்யுங்கள்

சம்பளதாரர்கள் ஜூலை 31-க்குள் வருமான வரி கணக்கை தாக்கல் செய்ய வேண்டும். சுயதொழில் செய்பவர்களுக்கு குறிப்பிட்ட நிபந்தனைகளின் அடிப்படையில் கூடுதல் அவகாசம் கிடைக்கலாம். காலக்கெடுவை தவறவிட்டால், பழைய வரி முறையை (Old Tax Regime) தேர்வு செய்யும் வாய்ப்பு பாதிக்கப்படலாம். இதனால் இயல்புநிலை (Default) வரி முறை அமலுக்கு வரும்.

2. சரியான ITR படிவத்தை தேர்வு செய்யுங்கள்

உங்கள் வருமானம் மற்றும் முதலீட்டு விவரங்களுக்கு ஏற்ப சரியான ITR Form-ஐ பயன்படுத்துவது மிகவும் முக்கியம். வெளிநாட்டு சொத்துகள், வெளிநாட்டு முதலீடுகள் அல்லது நிறுவன இயக்குநர் பதவி போன்றவை இருந்தால், ITR-1க்கு பதிலாக ITR-2 தாக்கல் செய்ய வேண்டியிருக்கும். தவறான படிவத்தில் தாக்கல் செய்தால், கணக்கு செல்லாததாக கருதப்பட வாய்ப்பு உள்ளது.

3. சரியான வரி முறையை தேர்வு செய்யுங்கள்

பழைய வரி முறை (Old Tax Regime) மற்றும் புதிய வரி முறை (New Tax Regime) ஆகிய இரண்டிலும் உங்களுக்கான வரிச்சுமையை ஒப்பிட்டு பார்த்த பிறகே தேர்வு செய்ய வேண்டும். குறிப்பாக, அதிகளவிலான வரி விலக்குகள் மற்றும் கழிவுகள் (Deductions) பெறுபவர்களுக்கு பழைய வரி முறை பயனுள்ளதாக இருக்கலாம். பொதுவாக ரூ.8 லட்சம் அல்லது அதற்கு மேற்பட்ட கழிவுகள் உள்ளவர்களுக்கு பழைய வரி முறையை பரிசீலிக்கலாம்.

4. AIS மற்றும் TIS விவரங்களை சரிபார்க்க மறக்காதீர்கள்

Annual Information Statement (AIS) மற்றும் Taxpayer Information Summary (TIS) ஆகியவை முக்கிய ஆவணங்கள் என்றாலும், அவற்றை மட்டும் முழுமையாக நம்பக்கூடாது. முதலில் உங்கள் மொத்த வருமானத்தை நீங்களே கணக்கிட்டு, பின்னர் AIS மற்றும் TIS-ல் உள்ள விவரங்களுடன் ஒப்பிட்டு சரிபார்ப்பது பாதுகாப்பான நடைமுறையாகும்.

5. நிதியாண்டில் வேலை மாறியிருந்தால் கவனம்

ஒரே நிதியாண்டில் இரண்டு அல்லது அதற்கு மேற்பட்ட நிறுவனங்களில் வேலை செய்திருந்தால், அனைத்து நிறுவனங்களிலிருந்தும் கிடைத்த வருமானத்தையும் சேர்த்து கணக்கிட வேண்டும். தற்போதைய நிறுவனத்தின் Form-16-ஐ மட்டும் வைத்து ITR தாக்கல் செய்தால், முந்தைய நிறுவனத்தின் வருமானம் விடுபட வாய்ப்புள்ளது.

6. கிரிப்டோ முதலீட்டை மறைக்க வேண்டாம்

கிரிப்டோகரன்சி உள்ளிட்ட Virtual Digital Assets (VDA) மூலம் வருமானம் ஈட்டியிருந்தால், அதனை கட்டாயம் ITR-ல் குறிப்பிட வேண்டும். கிரிப்டோ முதலீட்டில் ஏற்பட்ட இழப்பை, லாபத்துடன் ஈடுகட்ட (Set-off) முடியாது. மேலும், கிரிப்டோ லாபத்திற்கு தற்போது 30% என்ற நிலையான வரி விதிக்கப்படுகிறது.

முடிவாக, வருமான வரி கணக்கை அவசரமாக தாக்கல் செய்வதற்குப் பதிலாக, வருமான விவரங்கள், வரி விலக்குகள், சரியான ITR படிவம் மற்றும் வரி முறையை கவனமாக சரிபார்த்த பிறகே தாக்கல் செய்வது சிறந்தது. இது தேவையற்ற அபராதம், வரித்துறை நோட்டீஸ் மற்றும் கூடுதல் வரிச்சுமையைத் தவிர்க்க உதவும்.